Sammisat
	Illunnguami unnuineq Qalipakkat assigiinngitsut Hotel Disko bay-mut E-mailerfik Kalaalerpalaartitsineq Kalattut qitinneq Kalaalimerngit Uaajeerneq   Puisit assigiinngitsut amii Allunaariaqattaarnerit   Sapannganik assassukkat Kalaallit pinnguaataat Ilulissat kangerluani pisummik angalaffissat Sanalukkat assigiinngitsut Umiatsiaannarmik angallassineq
		Kalaalerpalaartitsineq: Qasigiannguit Katersugaasiviat 1997-mi inuusuttunit sunngiffimmi sammisassaqartitsivimmiit Illunguaq qammakkamik tunineqarsimavoq - takuuk Illuutit ataanni Illunnguaq. Assassortartut ikioqatigalugit Illunnguami ima ittunik nittarsaassisinnaavugut: Kalaallit sorsunnersuaq kingulleq sioqqullugu angerlarsimaffigisartagarisimasaat alakkaruk pulaarlugulu. Illunnguaq ujaqqanik issunillu qammagaavoq, ilua qisunnik iikkersorsimavoq, qilaalersorsimalluni natilersorsimallunilu. Illeqarpoq anngajaarsuarmik, illeq makittartoqarpoq taamaalilluni inuit illermi sinissinnaasut amerlanerulersinnaasarlutik. Kissarsuutitoqannguamik amaruutissatortumik kiassartarpoq igasoqarsinnaallunilu. Qulleq ukkusissaq kusassaataasarpoq alutornartarlunilu, illerfiit pigisanut assigiinngitsunut ilitsiviusartut takuneqarsinnaapput. Juullikkut nalaanni nammineq orpilialiaq, nammineq siaarsartuliat juullikkunni nivingatinneqartarput, alutornartaqaallu. Tassanilu aamma unnuisoqarsinnaavoq.
	Kalaalimerngit: Kalaalimerngit assigiinngitsut piareersarneqartarput ullormi susassaqartitsinissamut. Puisit neqaat uusut, nikkut, saarulliit uukkallu panertut, ammassaat panertut assigisaallu ussingassaliarineqartarput. Pisuni annerusuni puisimik pilannerit pisarput, taamaalilluni nammineq takunninnissamut iganissamullu periarfissaqartarluni.
		Puisit amii assigiinngitsut: Ammit assigiinngitsunik piareersarneqarsimasut arnanik mersullaqqissunik suliarineqartut takuneqarsinnaapput. Taamaalilluni takuneqarsinnaalluni qanoq ammit assigiinngitsut mersorneqartarsimasut. Aammalu periarfissaqarputit nammineq misileerusukkuit merssukkanik assigiinngitsunik.
	Sapangaaqqanik assassukkat assigiinngitsut: Sapangaaqqat qalipaatigissaartut assigiinngitsorpassuarnut suliarineqartarput. Annertunernik aammalu minnerusunik tammaviuttussaqqittuusinnaasunik sanaartortoqarpoq. Aammalu illit soqutiginnikkuit namminertaaq misiliisinnaavutit sapakkanik nuisillutit.
	Sanalukkat saanernik imaluunniit ukkusissanik sanaat: Sanalukkat assigiinngitsorpassuit kusanartuliat, pinnersaasiat allallu sanaartorneqartarput. Uumasut assiigiinngitsut saarngi sanaartorneqartarput. Soqutiginnikkuillu namminertaaq misiliinissarnut periarfissaqarputit.
		Qalipakkat assigiinngitsut: Illoqarfitsinni qalipaasartoqarpuguttaaq pikkorissumik. Titartaaneq qanoq ingerlakkajuttartoq takuneqarsinnaavoq. Aammalu illit soqutiginnikkuit misiliinissarnut periarfissaqarputit.
	Kalattut qitinneq: Inniminneereernikkut kalattut qitittunik meeqqanik takunnittoqarsinnaavoq. Meeqqat kalattut qitittartut tassaanerukkajupput sunngiffimmi sammisassaqartitsivimmiit sungiusarneqartartut. Inniminniinikkut: 150,00 kr.
	Uaajeerneq: Illoqarfitsinni inuusuttunnguamik uaajeernermik ilinniagaqarsimasumik peqarpugut. Uaajeerneq qangarsuarli nunatsinni ingerlanneqartarsimavoq. Tassalu meeqqat inersimasullumi ersisaarneqartarsimapput, anersaakkut nakuunerusinnaanissaat anguniarlugu. Uaajeernermi kiinaq qalipanneqarlunilu ilaatigullu qilersorneqartarpoq. Soqutiginnittut inniminneereernikkut uaajeerfigineqarneq misigisinnaavaat puiunaatsoq alutornarluinnartorlu. Inniminniinikkut: 300,00 kr.
		Allunaariaqattaarnerit: Kalaallit siuaasatta qajaq angallatigissallugu pinngitsoorsinnaanngilaat. Taamaattumillu qajaqqissorsuussagaanni allunaariaqattaarnerit pinngitsoorneqarsinnaanngilluinnarsimapput. Ukiuutillugu illunnguani qammagaasut iluanni allunaariaqattaarnerit ukiuutillugu taartorsuutillugu issittorsuutillugulu ingerlanneqartarsimapput. Soqutiginnittut inniminniinikkut allunaariaqattaartunik takunnissinnaapput. Aammalu soqutiginnittut namminertaaq periarfissaqarput misiliinissaminnik. Inniminniinikkut: 150,00 kr.
	Kalaallit pinnguaataat assigiinngitsut: Kalaallit pinnguaataannik assigiinngitsunik pigisaqarpugut takutissinnaasatsinnik aammalu pinnguaatigineqarsinnaasunik. Arsaaqqat aliikkutaalluartartut ilaat sammineqarluartarput. Arsaaqqat tassaapput qisunnguit marluk imminnut ungasitsinnagit qilerneqarsimasut. Arsaaqqallu tigoriarlugit illugiilluni ingeriarluni noqqoruunnikkut ajugaaniunneqartarpoq. Aammalu assigiinngitsuni iliuuseqarluni aliikkusersuutigineqarsinnaasarput. Eqitaq tassaavoq qisuk ulamertunngorlugu sananeqarsimasoq. Qisuk ulamertoq illugiilluni ingilluni tigoriarlugu noqqoruussutigineqartarpoq ajugaaniussutigalugu. Ajagaq tassaavoq qangarsuummalli aamma pinnguaatigineqartarsimasoq. Puisip imaluunniit, ukallip kiasia imaluunniit, puisip kuutsia sananeqakkajuttarpoq. Ajakkami putut angissutsit assigiinngitsuusut putuliussuunneqartarput. Taamalu qisunnguamut aalajangiunneqarsimasumut putunnguit eqqortinniarneqartarput. Qanga ajakkamik pinnguarnermi ileqqut assigiinngitsut atorneqartarsimapputtaaq. Pisartut assigiinngitsut qulaani taaneqartut immikkut akilersorneqarsimanngillat. Kisiannili immikkut innimminnertariallit akillit maluginiakkit, taamalu soqutigigukkit inniminnereerlugit. Pulaarnermi akiliisoqarsinnaavoq. Pulaarneq inummut ataatsimut akeqarpoq 50,00 kr. Pulaartut inuit tallimat angusimagunikkit 20 %-mik akikillisaaffigineqartarput, saniatigullu inniminnertariallit ataatsimoorullugit akiligassaallutik. Nuannertaqaaq. Tikilluaqqoreerpatsigillu kalaalerpalaartitsinissamut.
		Takornarissanik angallassineq umiatsiaannarmik, katersugaasivik attaveqarfigiuk imaluunniit. Savik inuit 12-it angullugit ilaasoqarsinnaasoq, attaveqarfigiuk Poul Erik Nielsen Oqarasuaat: 91 12 11 imaluunniit: 91 14 87
		Seqernup kaaviinnarnera aammalu Diskobugt-imi isikkivik Qaqqarsuarmiit takullugu.
	Sanaluttarfissaq assassortartut aammalu eqqumiitsuliortut katersugaasiviup eqqaani, alakkarneqarsinnaalissooq.
	© Webmaster Kristian Andersen Sisimiut Katersugaasiviat. Sidste opdateret: Juli 16, 2001